هو ونايم ..صار يحكي ..سمعت بادني شي
ما تفسر معي.. مدري غنا. مدري حكي..
وبلشت تشتي برا وقوي صوت المطر
وصوتو قوي.. كأنو قاصد يسمّعني.. الغنا.. مدري الحكي
شغلت الراديو وعليتو.. جنب تختو حطيتو
سكت صار يتسمع
وخف صوت المطر
طلعت موسيقى ما كنت بعرفها
بس هو ونايم ابتسم يبدو كان بيعرفها
غيرت المحطة صوتو علي.. مدري غنا.. مدري حكي
رجعتا .. ما سكت
والمطر برا ما سكت
قوي.. قوي .. والهوا قوي.. وانفتح شباك
فاق مرعوب وتطلع فيني.. هدي
قللي ليش لهلأ
قلتللو رح نام هلأ
سألتو اذا كان عم يحلم.. قللي لأ
سمعت صوت تطلعت.. شفت الباب انشق
سكرتو وسكرت الشباك.. فوراً رجع غفي
طفيت الراديو والضو.. نمت جنبو وحضنتو
مدري كيف استرجيت
صرت دندن ذات الموسيقى اللي طلعت
مسكني من ايدي.. سكتت.. وقف قلبي
شد على ايدي.. وقللي انا منيح
قلتللو انا احسن.. شديت على ايدو ..ونمت
وبعد شوي.. طلع الضو
وخلصت اول ليلة النا سوا
